മലയാളികളുടെ പ്രിയങ്കരനായ കലാഭവൻ മണിയുടെ അഭിനയജീവിതത്തിലെ ഏറ്റവും നിർണായകമായ വഴിത്തിരിവിനെക്കുറിച്ചുള്ള വെളിപ്പെടുത്തൽ വീണ്ടും ശ്രദ്ധ നേടുകയാണ്. തമിഴ് സിനിമയിൽ തനിക്ക് വലിയ അംഗീകാരം നേടിക്കൊടുത്ത അവസരം യാദൃശ്ചികമായിരുന്നില്ലെന്നും, അതിന് പിന്നിൽ നടൻ ദിലീപിന്റെ ശക്തമായ ഇടപെടലുണ്ടായിരുന്നുവെന്നും മണി തുറന്നുപറയുന്നു.

ALSO READ: നീ സ്വപ്നം കാണുന്ന എല്ലാം സഫലമാകട്ടെ” – വിനീത് ശ്രീനിവാസന്റെ സന്ദേശം കേട്ട് വികാരാധീനനായി നിവിന്‍ പോളി

തമിഴിൽ മുൻപ് അഭിനയിച്ച രണ്ട് സിനിമകൾ പരാജയപ്പെട്ടതിനെ തുടർന്ന്, അവിടെ ഇനി അഭിനയിക്കേണ്ടതില്ലെന്ന് ഉറച്ച തീരുമാനമെടുത്ത സമയമായിരുന്നു അത്. തമിഴ് സിനിമയെ പൂർണ്ണമായി ഉപേക്ഷിക്കാൻ ഒരുങ്ങിയിരിക്കുമ്പോഴാണ് ‘ജെമിനി’ എന്ന ചിത്രത്തിലേക്കുള്ള ക്ഷണം അദ്ദേഹത്തെ തേടിയെത്തുന്നത്. എന്നാൽ മുൻ അനുഭവങ്ങളുടെ നിരാശ കാരണം ആ അവസരം സ്വീകരിക്കാൻ മണി തയ്യാറായില്ല.

ഈ ഘട്ടത്തിലാണ് സഹതാരമായ ദിലീപ് രംഗത്തെത്തുന്നത്. ‘കുബേരൻ’ എന്ന സിനിമയുടെ ഷൂട്ടിംഗ് നടക്കുന്നതിനിടെയാണ് ‘ജെമിനി’യുടെ സംവിധായകൻ ശരൺ മണിയെ സമീപിക്കുന്നത്. എന്നാൽ താൻ പോകില്ലെന്ന് ഉറച്ച് നിന്ന മണിയെ ദിലീപ് ശക്തമായി പ്രേരിപ്പിച്ചു.
“നീ ആ പടത്തിന് പോകണം, പോയി ചെയ്യണം” എന്ന ദിലീപിന്റെ നിർബന്ധമാണ് തന്നെ തീരുമാനം മാറ്റാൻ പ്രേരിപ്പിച്ചതെന്ന് മണി പറയുന്നു. പിന്നീട് തിരിഞ്ഞുനോക്കുമ്പോൾ, ആ ഒരൊറ്റ നിർബന്ധം തന്റെ കരിയറിലെ തന്നെ ഏറ്റവും വലിയ വഴിത്തിരിവായിരുന്നുവെന്നും അദ്ദേഹം കൂട്ടിച്ചേർക്കുന്നു.

ഇതിനിടെയാണ് വിനയൻ സംവിധാനം ചെയ്ത ‘ഊമപ്പെണ്ണിന് ഉരിയാടാപ്പയ്യൻ’ എന്ന ചിത്രത്തിലേക്കും മണിക്ക് അവസരം ലഭിച്ചത്. ജയസൂര്യയും കാവ്യാ മാധവനും അഭിനയിച്ചിരുന്ന ചിത്രത്തിൽ അഭിനയിക്കാൻ മണി സമ്മതം അറിയിക്കുകയും ചെയ്തിരുന്നു. എന്നാൽ ഷൂട്ടിംഗിനിടെ ജയസൂര്യക്ക് പരിക്കേറ്റതിനെ തുടർന്ന് ചിത്രത്തിന്റെ ഡേറ്റുകൾ മാറ്റേണ്ടി വന്നതോടെ, മറ്റ് സിനിമകൾ സ്വീകരിക്കാൻ വിനയൻ അനുവാദം നൽകി.

ALSO READ: കുരുന്നുകളുടെ കൈപിടിച്ച് മുദ്രകളിലേക്കു നയിച്ച് അനു സിത്താര; ഹൃദയം നിറയുന്ന ദൃശ്യങ്ങൾ

ഈ ഒഴിവിലാണ് സുന്ദർദാസ് സംവിധാനം ചെയ്ത ‘കുബേരൻ’ എന്ന ചിത്രത്തിലേക്ക് മണി എത്തുന്നത്. യഥാർത്ഥത്തിൽ ആ വേഷം ചെയ്യേണ്ടിയിരുന്നത് സലിം കുമാറായിരുന്നുവെന്നും, അപ്രതീക്ഷിതമായ സാഹചര്യങ്ങളിലൂടെയാണ് താൻ ആ കഥാപാത്രത്തിലേക്ക് എത്തിയതെന്നും മണി വെളിപ്പെടുത്തുന്നു. എന്നാൽ കുബേരനിൽ ജോയിൻ ചെയ്ത് രണ്ട് ദിവസത്തിനുള്ളിൽ തന്നെ ജയസൂര്യയുടെ പരിക്ക് ഭേദമായി, വിനയൻ വീണ്ടും മണിയെ വിളിച്ചു.

“ജയസൂര്യക്ക് അത് ആദ്യ വലിയ അവസരമായതുകൊണ്ട് അവൻ ആ ചിത്രം വിട്ടില്ല. പക്ഷേ അപ്പോഴേക്കും എനിക്ക് അവിടെ പോകാൻ കഴിയാത്ത അവസ്ഥയായിരുന്നു. അത് അന്ന് ഒരു വലിയ പ്രശ്നമായി തോന്നിയെങ്കിലും, പിന്നീട് അത് തന്നെ ജെമിനി എന്ന ചിത്രത്തിലേക്കുള്ള വഴിയായി,” മണി ഓർക്കുന്നു.

വിനയൻ ചിത്രത്തിൽ അഭിനയിക്കാൻ കഴിയാതെ പോയത് താൽക്കാലികമായൊരു നഷ്ടമായി തോന്നിയെങ്കിലും, അതാണ് തമിഴിലെ സൂപ്പർഹിറ്റ് ചിത്രമായ ‘ജെമിനി’യിലേക്കും തുടർന്ന് തെന്നിന്ത്യൻ സിനിമയിലെ തിരക്കേറിയ നടനായി മാറുന്നതിലേക്കും വഴിയൊരുക്കിയത്. ദിലീപിന്റെ ഉപദേശവും നിർബന്ധവും, കുബേരൻ ചിത്രത്തിന്റെ സമയത്ത് ഉണ്ടായ അപ്രതീക്ഷിത സംഭവവികാസങ്ങളും ചേർന്നതാണ് തന്റെ തമിഴ് സിനിമാ പ്രവേശനത്തിന് പിന്നിലെ യഥാർത്ഥ കാരണമെന്ന് കലാഭവൻ മണി അടിവരയിടുന്നു.