സമൂഹമാധ്യമങ്ങളിൽ ദിവസേന നിരവധി വിഡിയോകളാണ് വൈറലാകുന്നത്. അത്തരത്തിൽ ഏറ്റവും പുതിയതായി ശ്രദ്ധ നേടുന്നത് മുംബൈയിലെ ഒരു ലോക്കൽ ട്രെയിനിൽ നിന്നുള്ള ദൃശ്യങ്ങളാണ്. ട്രെയിനിലെ സീറ്റിൽ കാൽവച്ചിരുന്ന യാത്രക്കാരനെ സഹയാത്രികൻ കരണത്തടിക്കുന്നതാണ് വിഡിയോയിൽ കാണുന്നത്.
ട്രെയിനിൽ നിൽക്കുകയായിരുന്ന മറാത്തി ഭാഷയിൽ സംസാരിക്കുന്ന ഒരാൾ, സീറ്റിൽ ഇരുന്ന യാത്രക്കാരനോട് ആദ്യം വാക്കേറ്റം നടത്തുകയും തുടർന്ന് അപ്രതീക്ഷിതമായി മുഖത്തടിക്കുകയുമാണ് ചെയ്യുന്നത്. ട്രെയിനിലെ സീറ്റ് യാത്രക്കാർ ഇരിക്കാനായി ഉപയോഗിക്കേണ്ടതാണെന്നും, കാൽ കയറ്റിവയ്ക്കാനുള്ളതല്ലെന്നും അടിച്ചയാൾ ശക്തമായി പ്രതികരിക്കുന്നതും വിഡിയോയിൽ കേൾക്കാം.
സീറ്റിൽ കാൽവച്ചിരുന്ന യാത്രക്കാരൻ പരസ്യമായി മാപ്പ് പറയണമെന്ന് ആവശ്യപ്പെട്ടും സമൂഹമാധ്യമങ്ങളിൽ നിരവധി പേർ രംഗത്തെത്തി. വിഡിയോ പോസ്റ്റ് ചെയ്തതിന് പിന്നാലെ തന്നെ ലക്ഷക്കണക്കിന് ആളുകൾ അത് കണ്ടു, കമന്റുകളും പ്രതികരണങ്ങളും വേഗത്തിൽ എത്തി.
സംഭവത്തെക്കുറിച്ച് സമൂഹമാധ്യമങ്ങളിൽ രണ്ട് തരത്തിലുള്ള അഭിപ്രായങ്ങളാണ് ഉയർന്നത്. പൊതുസ്ഥലങ്ങളിൽ പാലിക്കേണ്ട മര്യാദകൾ ലംഘിക്കുന്നത് അംഗീകരിക്കാനാകില്ലെന്നും, സീറ്റിൽ കാൽവയ്ക്കുന്നത് തെറ്റായ പ്രവൃത്തിയാണെന്നും ഒരുവിഭാഗം അഭിപ്രായപ്പെട്ടു. പൗരധർമത്തെ കുറിച്ച് ബോധവത്കരണം നടത്തിയതിൽ തെറ്റില്ലെന്നും ഇവർ പറഞ്ഞു.
അതേസമയം, പൊതുസ്ഥലത്ത് ഒരാളെ മർദിക്കുന്നത് കുറ്റകരമാണെന്നും, നിയമം കൈയിലെടുക്കുന്ന പ്രവണതയെ അനുകൂലിക്കാനാകില്ലെന്നും മറ്റൊരു വിഭാഗം വിമർശിച്ചു. മറാത്തി സംസാരിക്കുന്ന വ്യക്തി തന്റെ അസ്വസ്ഥത മറ്റുള്ളവരുടെ മേൽ തീർക്കുകയായിരുന്നുവെന്നായിരുന്നു ചിലരുടെ പ്രതികരണം.
യാത്രക്കാരൻ യുപിയിലോ ബിഹാറിലോ നിന്നുള്ളവനായിരിക്കാമെന്നും, മുംബൈയിൽ ഇത്തരം സംഭവങ്ങൾ പതിവായി നടക്കുന്നതായും ആരോപിച്ചുള്ള കമന്റുകളും ഉണ്ടായി. സ്വന്തം മസിൽ പവർ തെളിയിക്കാൻ വേണ്ടി അതിക്രമം നടത്തുന്നത് ശരിയല്ലെന്നും ചിലർ അഭിപ്രായപ്പെട്ടു.
അതേസമയം, പൊതുസ്ഥലങ്ങളിൽ പാലിക്കേണ്ട ശീലം യാത്രക്കാരനെ പഠിപ്പിച്ചതായി മറാത്തി സംസാരിച്ച വ്യക്തിയുടെ നടപടി ന്യായീകരിച്ചും നിരവധി കമന്റുകൾ സോഷ്യൽ മീഡിയയിൽ നിറഞ്ഞു.
