പുതുവത്സരാഘോഷത്തിനായി വിജയ് ദേവരകൊണ്ടയും രശ്മിക മന്ദാനയും യാത്ര തിരിച്ചതാണ് ഇപ്പോൾ സോഷ്യൽ മീഡിയയിൽ ചർച്ചയാകുന്നത്. ഹൈദരാബാദ് വിമാനത്താവളത്തിൽ ഇരുവരെയും ഒരുമിച്ചാണ് കണ്ടത്. ഇന്ന് പുലർച്ചെയോടെയാണ് ഇരുവരുടെയും യാത്ര ആരംഭിച്ചത്. സാധാരണ യാത്രക്കാരെ പോലെ ലളിതമായ വസ്ത്രധാരണത്തിൽ, പ്രത്യേക ആഡംബരമില്ലാതെ വിമാനത്താവളത്തിലൂടെ നടന്നുവന്നെങ്കിലും, ഇരുവരെയും തിരിച്ചറിഞ്ഞതോടെ ആരാധകരുടെയും യാത്രക്കാരുടെയും ശ്രദ്ധ അവരിലേക്കെത്തി.
ഈ കാഴ്ച പകർത്തിയ വീഡിയോകളും ചിത്രങ്ങളും ഇതിനകം തന്നെ വൈറലായി. അതോടൊപ്പം, വിജയ്–രശ്മിക കൂട്ടുകെട്ട് ഒരുമിച്ച് പുതുവത്സരം ആഘോഷിക്കാനാണോ യാത്രയെന്ന തരത്തിലുള്ള ചർച്ചകളും. താരപദവിയുണ്ടെങ്കിലും വളരെ സിംപിൾ ആയി പെരുമാറുന്ന ഇരുവരുടെയും സമീപനം ഏവരെയും ആകർഷിച്ചു.
സ്ക്രീനിലും പുറത്തും ഈ ജോഡിയുടെ കെമിസ്ട്രി ഏറെക്കാലമായി ആരാധകർ ആസ്വദിച്ചുവരികയാണ്. സ്വകാര്യ ജീവിതം പൊതുവിൽ പങ്കുവെക്കാൻ ഇരുവരും മടിക്കുന്നവരാണെങ്കിലും, പൊതുപരിപാടികളിലും യാത്രകളിലും ഒരുമിച്ച് പ്രത്യക്ഷപ്പെടുന്നത് ആരാധകർക്ക് അധിക ആവേശം നൽകുന്നുണ്ട്.
വിജയ് ദേവരകൊണ്ടയുടെ അവസാനമായി പുറത്തിറങ്ങിയ ചിത്രം റൊമാന്റിക് ഡ്രാമയായ കുഷി ആയിരുന്നു. കഥയും താരത്തിന്റെ പ്രകടനവും കൊണ്ട് ചിത്രം പ്രേക്ഷകഹൃദയം നേടി. 2026-ൽ റിലീസ് ചെയ്യാനിരിക്കുന്ന ആക്ഷൻ ചിത്രമായ റൗഡി ജനാർദ്ദനയ്ക്കായി ആരാധകർ കാത്തിരിക്കുകയാണ്. ചിത്രത്തിന്റെ ഔദ്യോഗിക പ്രൊമോ അടുത്തിടെ പുറത്തിറങ്ങിയതോടെ പ്രതീക്ഷകൾ കൂടി.
രശ്മിക മന്ദാന അവസാനമായി അഭിനയിച്ചത് തമ്മ എന്ന ചിത്രത്തിലാണ്. ഹിന്ദിയിലും ദക്ഷിണേന്ത്യൻ സിനിമകളിലും നിരവധി പ്രോജക്ടുകൾ വിവിധ ഘട്ടങ്ങളിലായതിനാൽ, തിരക്കേറിയ നടിമാരിൽ ഒരാളാണ് രശ്മിക. മൈസയ്ക്ക് പുറമേ, പുഷ്പ 3യും അണിയറയിൽ ഒരുങ്ങുന്നുണ്ട്.
