ഒടിടി പ്ലാറ്റ്ഫോമുകള് വ്യാപകമായി പ്രചാരത്തിലായതോടെ സബ്ടൈറ്റില്സിന് ലഭിച്ച പ്രാധാന്യം ഇന്ന് എല്ലാവര്ക്കും വ്യക്തമാണ്. എന്നാല് ഒരുകാലത്ത് ഈ ആവശ്യകത അത്ര ഗൗരവമായി കണക്കാക്കിയിരുന്നില്ല. ഒടിടി എന്ന ആശയം പോലും സിനിമാലോകത്ത് ഇല്ലാതിരുന്ന കാലത്താണ് രേഖ്സ് സബ്ടൈറ്റില് രംഗത്തേക്ക് കടന്നുവന്നത്. മലയാളികള് സ്വന്തം ഭാഷയിലെ സിനിമകള് കാണുമ്പോള് സബ്ടൈറ്റില്സിന്റെ ആവശ്യകത അധികമായി അനുഭവപ്പെടാറില്ലെങ്കിലും, മലയാള സിനിമയെ ആസ്വദിക്കുന്ന അന്യഭാഷാപ്രേക്ഷകര്ക്ക് അത് നിര്ണായകമാണ്.
2007 ലാണ് രേഖ്സ് സബ്ടൈറ്റില്സ്റ്റായി ഔദ്യോഗികമായി പ്രവര്ത്തനം ആരംഭിക്കുന്നത്. വിണ്ണൈത്താണ്ടി വരുവായ എന്ന ചിത്രത്തിലൂടെയാണ് സബ്ടൈറ്റില് എന്നൊരു വിഭാഗം ശ്രദ്ധിക്കപ്പെടാന് തുടങ്ങിയത്. എന്നാല് എന്തിരന് റിലീസ് ചെയ്തതോടെ സബ്ടൈറ്റില്സിന്റെ പ്രാധാന്യം തമിഴ് സിനിമാലോകം ഗൗരവമായി തിരിച്ചറിഞ്ഞു. തുടര്ന്ന് ഇതുവരെ എണ്ണൂറിലധികം സിനിമകള്ക്ക് രേഖ്സ് സബ്ടൈറ്റില്സ് നല്കിയിട്ടുണ്ട്. തുടക്കത്തില് പ്രധാനമായും അന്താരാഷ്ട്ര ഫിലിം ഫെസ്റ്റിവലുകളിലേക്ക് പോകുന്ന സിനിമകളിലായിരുന്നു ഈ പ്രവര്ത്തനം. പിന്നീട് ഒടിടി പ്ലാറ്റ്ഫോമുകള് സജീവമായതോടെ സാധ്യതകളും വന്തോതില് വര്ധിച്ചു.
വിജയ്യുടെ കടുത്ത ആരാധിക കൂടിയാണ് രേഖ്സ്. കാവലന് മുതല് പുതിയ ചിത്രമായ ജനനായകന് വരെ പതിനാലോളം വിജയ് സിനിമകള്ക്ക് അവര് സബ്ടൈറ്റില്സ് തയ്യാറാക്കിയിട്ടുണ്ട്. പഴയ വിജയ് ചിത്രങ്ങള് ഒടിടിയില് റിലീസ് ചെയ്തപ്പോഴും ഈ ലിസ്റ്റ് വിപുലമായി. ഈ സഹകരണത്തിനിടയിലാണ് വിജയുമായി രേഖ്സ് അടുത്ത സൗഹൃദം രൂപപ്പെടുന്നത്.
നന്പന് എന്ന സിനിമയുടെ ലൊക്കേഷനിലാണ് ഇരുവരും ആദ്യമായി നേരില് കണ്ടുമുട്ടിയത്. സബ്ടൈറ്റില്സ്റ്റെന്ന നിലയിലാണ് ആദ്യം സംഭാഷണം തുടങ്ങിയത്. ഫിലിം ഫെസ്റ്റിവലുകളില് സബ്ടൈറ്റില്സ് വഴി നമ്മുടെ സിനിമകള്ക്ക് ലഭിക്കുന്ന അന്താരാഷ്ട്ര അംഗീകാരം വിശദീകരിച്ചപ്പോള് വിജയ് അതിന്റെ മൂല്യം പൂര്ണമായി മനസ്സിലാക്കി, ആവശ്യമായ എല്ലാ പിന്തുണയും വാഗ്ദാനം ചെയ്തു. അതിന്റെ ഭാഗമായാണ് കാവലന് ഷാങ്ഹായ് ഇന്റര്നാഷണല് ഫിലിം ഫെസ്റ്റിവലിലേക്ക് അയച്ചത്.
ഫെസ്റ്റിവലിന് രേഖ്സും വിജയ്യും, രേഖ്സിന്റെ ഭര്ത്താവ് ഹരിയും മകളും ഒരുമിച്ചാണ് പോയത്. ചൈനയില് തന്റെ സിനിമയ്ക്ക് ലഭിച്ച സ്വീകരണവും അഭിനന്ദനവും നേരില് കണ്ടപ്പോഴാണ് സബ്ടൈറ്റില്സിന്റെ ശക്തി വിജയ് യഥാര്ഥത്തില് തിരിച്ചറിഞ്ഞത്. ആരാധകര് ദൈവത്തെപ്പോലെ കാണുന്ന ഒരു താരമായിട്ടും വിജയ് ഏറെ ലളിതനാണ് എന്ന് രേഖ്സ് പറയുന്നു. അടുത്തിടപഴകുന്നവര്ക്കെല്ലാം അദ്ദേഹം വലിയ ബഹുമാനം നല്കും.
വിജയ് അധികം സംസാരിക്കുന്ന ആളല്ലെങ്കിലും, കംഫര്ട്ടബിള് ആയ ഇടങ്ങളില് അദ്ദേഹം തുറന്ന് സംസാരിക്കും. അതിനൊപ്പം തന്നെ അദ്ദേഹത്തിന് അതിമനോഹരമായ ഹ്യൂമര് സെന്സും ഉണ്ട്. ചൈനയില് വച്ചുണ്ടായ ഒരു സംഭാഷണത്തിനിടയില് സംഗീതയെ കുറിച്ച് വിജയ് “എന്റെ ബെറ്റര് ഹാഫ്” എന്ന് പറഞ്ഞപ്പോള്, രേഖ്സ് അതിനെ തിരുത്തി “ബെറ്റര് ഹാഫ് അല്ല, ഇക്വല് ഹാഫ്” ആണെന്ന് പറഞ്ഞു. ഹരി തനിക്ക് ഇക്വല് ഹാഫ് ആണെന്നും, സംഗീത വിജയിനും ഇക്വല് ഹാഫ് തന്നെയാണെന്നും അവര് കൂട്ടിച്ചേര്ത്തു.
പിന്നീട് സംസാരിച്ചുകൊണ്ട് നടക്കുന്നതിനിടെ കുറച്ച് ദൂരം ചെന്നപ്പോള് ഹരിയെ കാണാതായതായി ശ്രദ്ധിച്ചു. അപ്പോള് വിജയ് തമാശയോടെ “നിങ്ങളുടെ ഇക്വല് ഹാഫിനെ കാണാനില്ല, പോയി നോക്കൂ” എന്ന് പറഞ്ഞത് എല്ലാവരെയും ചിരിപ്പിച്ചു. ആ വാക്കുകള് പറഞ്ഞ സമയവും ശൈലിയും അതീവ രസകരമായിരുന്നുവെന്നും, അതിലൂടെ വിജയ്യുടെ ആരും അധികം കാണാത്ത ഹാസ്യപരവും മനുഷ്യസൗഹൃദപരവുമായ വശം തനിക്ക് കൂടുതല് വ്യക്തമായെന്നും രേഖ്സ് അഭിമുഖത്തില് പറഞ്ഞു.
