തന്മാത്ര എന്ന ചിത്രത്തിലെ ഇന്റിമേറ്റ് രംഗത്തെക്കുറിച്ച് തുറന്ന മനസ്സോടെ സംസാരിക്കുകയാണ് നടി മീര വാസുദേവ്. ആ സിനിമ പല നടിമാരും നിരസിച്ചത് ആ പ്രത്യേക രംഗം കാരണമാണെന്ന് മീര പറയുന്നു. എന്നാല് ആ രംഗത്തിന്റെ ആവശ്യകതയും കഥയിലെ പ്രാധാന്യവും തനിക്ക് വ്യക്തമായി മനസ്സിലായിരുന്നുവെന്നും താരം വ്യക്തമാക്കുന്നു.
ആ രംഗം ചിത്രീകരിക്കുന്നതിന് മുമ്പേ തന്നെ ചില വ്യക്തമായ നിബന്ധനകള് താന് മുന്നോട്ടുവച്ചിരുന്നുവെന്ന് മീര മനോരമ ഓണ്ലൈനിനോട് പറഞ്ഞു. സെറ്റില് ഏറ്റവും കുറച്ച് ആളുകള് മാത്രമേ ഉണ്ടായിരിക്കാവൂ എന്നും, തന്റെ സ്വകാര്യഭാഗങ്ങള് ദൃശ്യമായിക്കൂടാ എന്നും താന് വ്യക്തമാക്കിയിരുന്നു. ഈ കാര്യങ്ങള് ടീം പൂര്ണമായും അംഗീകരിക്കുകയും പാലിക്കുകയും ചെയ്തുവെന്നും താരം കൂട്ടിച്ചേര്ത്തു.
ബ്ലെസി സംവിധാനം ചെയ്യുന്ന ചിത്രത്തിനായുള്ള ആദ്യ കൂടിക്കാഴ്ചയില് തന്നെ ആ രംഗത്തെക്കുറിച്ച് സംവിധായകന് വളരെ സുതാര്യമായി സംസാരിച്ചിരുന്നുവെന്നും മീര ഓര്ക്കുന്നു. “ഈ സീന് ചെയ്യാന് നിങ്ങള് തയ്യാറാകുന്നില്ലെങ്കില് പ്രശ്നമില്ല” എന്ന് ബ്ലെസി വ്യക്തമാക്കിയിരുന്നുവെന്ന് മീര പറയുന്നു. നിരവധി നടിമാരെ സമീപിച്ചിരുന്നുവെങ്കിലും ഈ ഒരൊറ്റ രംഗം കാരണമാണ് പലരും പിന്മാറിയതെന്നും അദ്ദേഹം പറഞ്ഞിരുന്നു. അതിനാലാണ് ഈ രംഗം കഥയ്ക്ക് എത്രത്തോളം ആവശ്യമാണ് എന്ന് താന് ചോദിച്ചതെന്നും മീര വ്യക്തമാക്കി.
ആ ബന്ധം പ്രേക്ഷകര്ക്ക് യാഥാര്ത്ഥ്യമായി തോന്നണമെങ്കില് ആ രംഗത്തിന് വലിയ പ്രസക്തിയുണ്ടെന്ന് ബ്ലെസി വിശദീകരിച്ചതായും മീര പറയുന്നു. “കഥ ആവശ്യപ്പെടുന്നതിന് ഏറ്റവും മികച്ച രീതിയില് ചെയ്യാന് തയ്യാറാണ്, പക്ഷേ എന്റെ കംഫര്ട്ട് ഉറപ്പാകണം” എന്ന നിലപാടിലാണ് താന് നിന്നതെന്നും താരം വ്യക്തമാക്കി.
ഷൂട്ടിംഗ് സമയത്ത് സെറ്റില് ബ്ലെസി, ചീഫ് അസോസിയേറ്റ്, ക്യാമറമാന്, ഫോക്കസ് പുള്ളര് എന്നിവരെ മാത്രമേ അനുവദിച്ചിരുന്നുള്ളൂ. എല്ലാവരും തന്റെ കംഫര്ട്ടിനാണ് മുന്ഗണന നല്കിയതെന്നും അതുകൊണ്ട് തന്നെ യാതൊരു അസൗകര്യവും അനുഭവപ്പെട്ടില്ലെന്നും മീര പറയുന്നു. മോഹന്ലാല് ഷൂട്ടിംഗിനിടെ പലതവണ ക്ഷമ ചോദിച്ചിരുന്നുവെന്നും, ഇരുവരും പരസ്പരം പ്രൊഫഷണലായി മാത്രം സമീപിച്ചിരുന്നുവെന്നും താരം കൂട്ടിച്ചേര്ത്തു.
“ഇത് ജോലി മാത്രമാണ്, വ്യക്തിപരമായ കാര്യമല്ല” എന്ന ബോധ്യത്തോടെയാണ് ആ രംഗം ചെയ്തതെന്നും മീര പറയുന്നു. പിന്നീട് ആ സീന് ചിലര് നെഗറ്റീവായി പ്രചരിപ്പിച്ചെങ്കിലും യഥാര്ത്ഥത്തില് അത് വളരെ സ്വാഭാവികമായ ഒരു രംഗം മാത്രമാണെന്നും താരം വ്യക്തമാക്കി.
2005ല് തിയേറ്ററുകളിലെത്തിയ തന്മാത്രയില് മോഹന്ലാല് ആണ് നായകന്. ബ്ലെസി തന്നെയായിരുന്നു ചിത്രത്തിന്റെ തിരക്കഥയും സംവിധാനവും. ജഗതി ശ്രീകുമാര്, നെടുമുടി വേണു, അര്ജുന് ലാല് തുടങ്ങിയവരും പ്രധാന വേഷങ്ങളിലെത്തി. ചിത്രത്തിലെ അഭിനയത്തിന് മോഹന്ലാലിന് മികച്ച നടനുള്ള സംസ്ഥാന ചലച്ചിത്ര പുരസ്കാരം ലഭിച്ചു. മികച്ച ചിത്രം, മികച്ച സംവിധായകന്, മികച്ച തിരക്കഥ തുടങ്ങിയ പുരസ്കാരങ്ങളും തന്മാത്രയെ തേടിയെത്തിയിരുന്നു.
മീര വാസുദേവിനെ കുറിച്ച് കൂടുതൽ അറിയാൻ: മീര വാസുദേവ്
