കഴിഞ്ഞ കുറച്ച് ദിവസങ്ങളായി സമൂഹമാധ്യമങ്ങളിൽ വലിയ ശ്രദ്ധ നേടിയ ഒരു വീഡിയോയാണ് ഇപ്പോൾ വൈറലാകുന്നത്. മണലിൽ ആഴ്ന്നുപോയ മഹീന്ദ്ര സ്കോർപ്പിയോയെ മഹീന്ദ്ര ഥാർ ഉപയോഗിച്ച് ധൈര്യത്തോടെ പുറത്തെടുത്ത ഒരു സ്ത്രീയുടെ ദൃശ്യങ്ങളാണ് അതിൽ ഉള്ളത്. ഡൽഹിയിൽ നിന്നെത്തിയ വിനോദസഞ്ചാരിയായ ആ സ്ത്രീയുടെ ആത്മവിശ്വാസവും സമയോചിതമായ ഇടപെടലുമാണ് എല്ലാവരുടെയും കൈയ്യടി നേടിയത്. വീഡിയോയ്ക്ക് താഴെ അഭിനന്ദന കമന്റുകൾ ഒഴുകുകയാണ്.
തമിഴ്നാട്ടിൽ നിന്നെത്തിയ വിനോദസഞ്ചാരികളുടെ സ്കോർപ്പിയോ എസ്യുവിയാണ് മണലിൽ കുടുങ്ങിയത്. കണ്ണൂർ ജില്ലയിലെ മുഴപ്പിലങ്ങാട് ഡ്രൈവ്-ഇൻ ബീച്ചിലൂടെയായിരുന്നു വാഹനം സഞ്ചരിച്ചത്. നനഞ്ഞ മണലാണ് വണ്ടിക്ക് വെല്ലുവിളിയായത്. വലുപ്പവും ഭാരവും കൂടിയ എസ്യുവിയായതിനാൽ സ്കോർപ്പിയോയെ പുറത്തെടുക്കാൻ നാട്ടുകാർ ഏറെ സമയം ശ്രമിച്ചെങ്കിലും വിജയം കണ്ടില്ല.
ഇതേ സമയത്താണ് മഹീന്ദ്ര ഥാർ 4x4 വാഹനവുമായി എത്തിയ ആ സ്ത്രീ രംഗത്തെത്തുന്നത്. സാഹചര്യം വിലയിരുത്തിയ ശേഷം സ്കോർപ്പിയോയെ വലിച്ചുനീക്കി കരയ്ക്കടുപ്പിക്കാമെന്ന് അവർ തീരുമാനിച്ചു. ഥാറിനെ സ്കോർപ്പിയോയ്ക്ക് സമീപം നിർത്തി നാട്ടുകാരുടെ സഹായത്തോടെ കയർ കെട്ടി, വളരെ പെട്ടെന്ന് തന്നെ വാഹനം മണലിൽ നിന്നു പുറത്തെടുത്തു. അധികസമയം പോലും എടുത്തില്ല എന്നതാണ് എല്ലാവരെയും അതിശയിപ്പിച്ചത്.
വളരെ ധൈര്യത്തോടെയും ആത്മവിശ്വാസത്തോടെയും കൈകാര്യം ചെയ്ത ആ സ്ത്രീയെ തുടർന്ന് എല്ലാവരും നന്ദിയോടെ അഭിനന്ദിച്ചു. പലരും അവരോടൊപ്പം ഫോട്ടോകളും എടുത്തു. ഈ സംഭവത്തിന്റെ വീഡിയോ സോഷ്യൽ മീഡിയയിൽ വ്യാപകമായി പ്രചരിച്ചതോടെ ‘ഥാർ ലേഡി’ എന്ന പേരിലാണ് അവർ അറിയപ്പെടാൻ തുടങ്ങിയത്.
ഇന്ത്യയിലെ പല ബീച്ചുകളിലും വാഹനമോടിക്കുന്നത് നിയമവിരുദ്ധമാണെങ്കിലും, നിയമപരമായി കാറുകൾക്ക് പ്രവേശനം അനുവദിക്കുന്ന രാജ്യത്തെ അപൂർവ ബീച്ചുകളിലൊന്നാണ് കേരളത്തിലെ മുഴപ്പിലങ്ങാട് ബീച്ച്.
