മലയാളികൾക്ക് ഏറെ പരിചിതമായ അഭിനയപ്രതിഭയാണ് ദിവ്യ ശ്രീധർ. പത്തൊമ്പത് വയസുമുതൽ സിനിമയിലും സീരിയലുകളിലുമായി സജീവമായ ദിവ്യ, ഇന്ന് ടെലിവിഷൻ പ്രേക്ഷകരുടെ പ്രിയങ്കരിയായി മാറിക്കഴിഞ്ഞു. അടുത്തിടെയാണ് സീരിയൽ നടനും ഡബ്ബിംഗ് ആർട്ടിസ്റ്റുമായ ക്രിസ് വേണുഗോപാലുമായി ദിവ്യ വിവാഹിതയായത്. ഇത് ദിവ്യയുടെ രണ്ടാം വിവാഹമായിരുന്നു.
ഫ്ലവേഴ്സ് ടിവിയിൽ സംപ്രേഷണം ചെയ്യുന്ന ‘സുഖമോ ദേവി’ എന്ന സീരിയലിലാണ് ദിവ്യ ഇപ്പോൾ അഭിനയിച്ചു കൊണ്ടിരിക്കുന്നത്. ഈ സീരിയലിലൂടെ ലഭിക്കുന്ന പ്രതികരണങ്ങളെക്കുറിച്ച് പുതിയൊരു അഭിമുഖത്തിൽ താരം തുറന്നു സംസാരിക്കുകയാണ്. ചില രംഗങ്ങൾ ചിത്രീകരിച്ചതിന് ശേഷം സംവിധായകൻ എഴുന്നേറ്റ് നിന്നു കൈയടിച്ച അനുഭവം വരെ ഉണ്ടായിരുന്നുവെന്ന് ദിവ്യ പറയുന്നു. അതൊക്കെ തന്നെ വലിയ അംഗീകാരമായും പുരസ്കാരമായും തന്നെയാണ് കാണുന്നതെന്നും താരം കൂട്ടിച്ചേർത്തു.
സീരിയൽ കണ്ട ശേഷം പലരും തന്നെ ദിവ്യ എന്ന പേരിൽ അല്ല, കഥാപാത്രമായ ചന്ദ്രമതി എന്ന പേരിലാണ് വിളിക്കുന്നതെന്നും താരം പറയുന്നു. പ്രേക്ഷകർ കുടുംബാംഗത്തെപ്പോലെ തന്നെ സമീപിക്കുന്നതിൽ വലിയ സന്തോഷമുണ്ടെന്നും ദിവ്യ പറഞ്ഞു. സീരിയലിലെ കരച്ചിൽ രംഗങ്ങളിൽ ഗ്ലിസറിൻ പോലുള്ള സഹായങ്ങൾ ഒന്നും ഉപയോഗിക്കാറില്ലെന്നും, സ്വന്തം ജീവിതാനുഭവങ്ങൾ കഥാപാത്രത്തിലേക്ക് ചേർത്ത് അഭിനയിക്കുകയാണ് തന്റെ രീതിയെന്നും ദിവ്യ വ്യക്തമാക്കി. ചില സമയങ്ങളിൽ ജീവിതത്തിൽ താൻ ദിവ്യയായിരിക്കും, ചിലപ്പോൾ ചന്ദ്രമതിയായിരിക്കും എന്ന അനുഭവവുമുണ്ടെന്ന് താരം തുറന്നു പറഞ്ഞു.
‘സുഖമോ ദേവി’ക്ക് മുൻപ് ‘കൂടത്തായി’ എന്ന സീരിയലിൽ കൂടത്തായി കേസിലെ പ്രതിയായ ജോളിയുടെ കഥാപാത്രത്തെയാണ് ദിവ്യ അവതരിപ്പിച്ചത്. ജോളിയുടെ വേഷം ചെയ്ത കാലത്ത് പ്രേക്ഷകരിൽ നിന്ന് കടുത്ത പ്രതികരണങ്ങൾ നേരിട്ട അനുഭവവും ദിവ്യ അഭിമുഖത്തിൽ പങ്കുവച്ചു. ജോളിയുമായി മുഖസാദൃശ്യമുണ്ടെന്ന കാരണത്താലാണ് ആ കഥാപാത്രത്തിലേക്ക് തനിക്കു അവസരം ലഭിച്ചതെന്നും താരം പറഞ്ഞു. സീരിയൽ സംപ്രേഷണം ചെയ്യുന്ന സമയത്ത് പ്രേക്ഷകർ പലപ്പോഴും തനിക്കെതിരെ രോഷം പ്രകടിപ്പിച്ചിരുന്നുവെന്നും, എന്നാൽ ചില കാരണങ്ങളാൽ ആ സീരിയൽ പാതിവഴിയിൽ അവസാനിപ്പിക്കേണ്ടിവന്നതായും ദിവ്യ ശ്രീധർ വ്യക്തമാക്കി.
